Pituah Ayah


Assalamu’alaikum wr wb
Syukur jo puji kito panjekkan ka Hadirat Allah Swt
ateh sugalo rahmat jo karunianyo kapado kito, Shalawaik sarato Salam
kito kirimkan ka pado Junjuangan kito nabi Muhammad Saw, kito harok kan supaat nyo di ari akhir isuak.

Nak
kanduang Ilham Rhamadhan. Indak bapanjang Jo baleba bana, ayah
buk…ak pitaruah nangko. Baa mangko ayah bapituaruah jo bapasan
disiko nak, saba nak kok ayah curah kan bana kini ka anak alun lai jaleh
di anak, tapi ko ayah ba pitaruah di siko nak, isuak lai dapek anak
baco taruih, bia anak lai indak lupo, ciek lai nak dek ayah bapitaruah
di siko dek pangana indak sakali tumbuah nak, banyak nan ayah talupo,
jadi kok ayah bapitaruah di siko nak, bia kok ado nan takana nak ayah
sampaikan lai dapek ayah tukuak ari ka ari jo ayah tambah maso ka maso.
Kok gadang
anak isuak lai dapek anak baco, amal kan bana tu dek anak.
Nak
kanduang Sibiran Tulang Ayah caliak ari ka ari, anak ba tambah
gadang juo, nan kini nangko anak alah 8 bulan maunyi dunia nangko, itu
tando kontrak lah bapakai, lah ba kurang jatah anak 8 bulan di dunia
nangko. Nak kanduang janyo Ayah
Indak di
arok ameh jo perak nak, guno anak kami gadang kan, sikolah mangaji kami
masuakkan , itu utang amanaik dari tuhan, wajib tu di kami rang tuo
mambayia nyo nak, tapi samantang pun ba itu nak, kok tuo kami ko isuak,
kok badan indak talok manggabai lai, tantu ka anak tampek mamintak, anyo
sakadar untuak makan jo minum, indak do labiah dari itu nak, tapi asa
lai talok juo manggagai indak do taniaik untuak itu nak.
Bilo isuak
kami kok mati nak, di anak bana ta pacik pintu kubua, Sasuai bana jo
Ajaran ugamo kito “ Kok mati anak cucu Adam, putuih sugalo amalan di
dunia, kecuali 3 parakaro, nan partamo Sadakah Jariah, nan kaduo ilmu
nan bamamfaat, nan katigo du’a anak nan saleh” Baa mangko ayah
kecek di anak ta pacik pintu kubua, nan duo partamo sidakah jariah nan
kadi baco nak, dek iduik payah kini, bansaik mularaik urang imbaukan,
tantu kok indak cukuik sidakah nan kami bari kan, baitu pulo ilmu nan
bermamfaat, nan kami nangko bukan urang cadiak pandai, indak pulo alim
ulama nak, mangko apolah nan kadipakai ilmu nan dari kami nangko, nan
ado anyo anak surang, nan ka mamacik pintu kubua.

Oi nak
kanduang buah hati ayah… Danga dek anak ayah curahkan, simak kan bana ciek ciek, sado nan ayah tau nak
ayah curah kan, kok ado ayah talupo patuik di anak batanyo ka urang pandai,

Nan ukatu
kini ko nak, satantang badan diri anak, anak iyo bukan urang minang
saluruh nyo nak, nan sakarek darah anak datang dari jawa nak, tapi
samantang pun baitu nak, anak paralu tau nak, adaik minang nangko, sabab
anak urang minang juo nak walau pun saparo, tapi ukan ayah nak marabuik
anak dari mandeh nak, anak subananyo sabana kayo nak, dapek baraja jo
adaik jawa nak bias pulo baraja sacaro minang nak, di ma lai ka
kurangnyo badan anak, tingga di anak amalkan…….

Pitaruah Ayah Part 2

Nak Kanduang Sibiran Tulang, Buah hati limpapeh jantuang.

Kok anak lah gadang isuak, labia umua Sapuluah taun nak, Lah akil baligh urang namokan, lah ta latak nan wajib ateh diri anak Itu pasan inyiak Buyuang maso saisuak, apo nan wajib nantun nak, melah ayah cubo curah kan, tolong di anak ma nyimak kan, amal kan bana tu dek anak.

Nan wajib ateh diri kito nak subagai saurang muslim ado limo parakaro, nan Partamo adolah Mangucapkan Duo Kalimah Syahadat, nan Kaduo sumbayang limo wakatu Sahari samalam, nan Katigo Mambayiakan Zakat nak, Nan Ka ampek Puaso pado Bulan Rhamadhan, nan Kalimo Naiak Haji ka Makah Bilo Mampu.

Ba sabab ayah kecek kan anak urang Muslim nak, sabab nan urang Minag Kabau ko nak iyolah urang nan Baradaik basandi Syarak, Syarak basandi kitabullah, jadi nan urang Minang Kabau ko adolah Muslim sadonyonyo, nan batuhan ka Allah swt nan nabinyo adolah Nabi Muhammad Saw, jadi kok ado nan bukan urang muslim mangaku urang minang, itu mungkin urang Minang Kabau nan minang nyo lah abih anyo tingga Kabau nyo sajo lai nak, tapi kok nyo mangaku urang padang itu mungkin sajo nak, sabab nan Minang Kabau tu adolah padang tapi Nan padang Bukan Minang Kabau, alah tu ka jaleh di anak.

Melah ayah cubo uraikan ciek ciek nak.

Nan partamo maucapkan duo kalimah Syahadaht.

Oi nak kanduang, nan satantang duo Kalimah Syahadaht nangko, iko tandonyo urang masuak Ilsam, nan untuak anak dari kini kini lah ayah ajakan, ijan kan dari kini nak, dari mulo buyuang tapanca kadunia nangko, partamo buyuang mampadangakan pakiaak ateh dunia, sasudah buyuang dimandikan jo di baduang barasiah dek bidan, disinan lah ayah sambuik buyuang jo Azan nak, itu tando buyuang anak urang Mulsim.

Nan kaduo nak iyolah Sumbayang limo wakatu sahari samalam.

Kok isuak buyuang lah pandai mangecek nak, lah pandai ma ingek jo marekam, disinan tibo wajib ka bakeh kami rang tuo maaja buyuang caro Sumbayang sarato baacaannyo Jo Mangaji,.

Baa dari sumua nantun nak, itu labiah kurang umua buyuang 3 taun nak, sabab bia tabiaso buyuang isuak bilo lah gadang, bak kato rang tuo tuo “Ketek ta aja aja , mudo Ta bao bao Tuo Tarubah Tido”.

Nan ciek lai nak, sa umua umua nantun anak ibaraik kaset rekaman, itu kaset baru nak, untuak marekam rancak hasianyo, janiah jo barasiah suaronyo, sabab alun lai barisi nan lain lain, murah dek buyuang maingeknyo, capek di buyuang ma apanyo, kancang bana marekamnyo.

Nan kok lah gadang anak isuak tantu lah banyak isi rekaman, jikok balimpik pulo rekaman , disinan asia rekaman kok indak barasiah nak, sio sio ayah katokan.

Nan dek sabab itu nak , mangko sajak ketek lah di ajakan, bak kecek urang tuo juo “ Baraja ukatu ketek, ibaraik maukia di ateh batu, baraja katiko gadang samo jo maukia di ateh ayia”

Apo mukasuik subananyo, bia nak ayah curahkan ciek ciek, simak dek anak jaleh jaleh.
Cubolah caliak di buyung, kok kito maukia, ma mahek di ateh batu, habih bana ari baganti musim, musim batuka tahun, abih musim taun lah batuka, nan ukiran di batu co itu juo nak, indak barubah.
Tapi cubo caliak di anak, kutiko kito manyurek di ateh ayia, alun lai sa jangkan paukia di ansak, alun lai ukatu etongan minik, munkin baru ayo sadatiak, nan ukiran lah ilang ranap, ilang lanyok sagalo nan di surekkan, indak ba paidah tu namonyo, sio sio nak urang imbaukan.

Pitaruah Ayah Part 3

Oi Nak kanduang badan diri ayah, nan wakatu kiniko melah ayah sambuang baliak pitaruah nangko.

Nan kapatang alah duo ayah jalehkan bakeh anak, nan kini masuak nan katigo, yaitu mambaia zakaik nak bilo harato kito lah sampai nisabnyo.

Zakaik ko adolah pambarasiah harato nan lah kito dapek nan di bari dek tuhan, Jikok harato nan lah kito dapek tu lah sampai nisabnyo, itu berarti ado harato urang nan ta bao dek kito nak, mangkonyo harus kito kalua kan, kito barikan pado nan berhak, ijan sampai pulo kito mamakan harato urang, gadang paruik dek inyo nak, bukan gadang dek sanang tapi gadang dek murka tuhan, inda kan bana tu dek anak, nan ciek lai nak nan zakaik ko jan sampai pulo di agiahkan ka anak yatim, gadang doso kito dek inyo nak, sabab ba dek baitu, anak yatim tu urang tuonyo adolah saluruh urang muslim, jadi nan inyo ko tangguang jawab dek kito basamo, jan sampai pulo zakaik ba barian ka inyo, lai tu kajaleh di nak kanduang.

Satantang nisab itu kini nak, kok kurang jaleh dek ayah manarangkan, sabab ayah ukan urang alaim ulana, rancak anak batanyo pado nan tau, supayo jan kaliru anak beko, batanyo lah anak ka alim jo ulamo, atau ustad ayah kecek kan.

Labiah dari itu ado pulo Zakaik Fitrah nan wajaib kito baiyia satiok ari rayo puaso atau Idul Fitri, Iko adolah Zakaik pambarasiah diri nak, sahabih kito bapuaso sabulan panuah di bulan Rhamadhan, sudah tu kito barasiahkan diri jo Zakaik Fitrah ko.

Sapanjang nan ayah tau nak, manuruik nan ayah danga, sasuai jo kato ustad, bak raso bilo kito lah malakukan puaso pado bulan Ramadhan dan kito bayia zakaik ko nak, itu lah samo kito bantuak bayi baru lahia, barasiah dari sagalo doso, tapi nan ma nan bak nantun, tantu ta pulang pado amalan kito masiang masiang.

Taruih nan ka ampek adolah Puaso pado bulan Rhamadhan

Di dalam agamo kito Islam ado suatu bulan nan panuah jo rahmat Allah, di mano pado bulan nangko, kito pun wajib malakukan amalan puaso nak salamo sabulan panuah.

Puaso ko adolah Manahan diri dari sagalo hawa nafasu, sarato makan jo minum pado siang hari mulai tabik fajar sampai tabanam mato ari.

Nak kanduang sibiran tulang, ayah pasankan bana bakeh buyuang, ijan sampai buyuang talalai, manuruik kan hawa nafasu, sato pulo indak puaso cando urang nan lamah iman nyo, jauah kan bana tu dek anak.

Nyampang isuak anak jadi rang panggaleh, manggaleh nasi sarato aia, Nan Usah usah kadai di buakak di siang puaso nak, Berang tuhan kabakeh awak, awak ka manjadi gunjiangan urang, cilako kok tumbuah ka badan diri, tapi bilo ari lah baransua sanjo, kiro kiro sasudah sumbayang Asya nak, basugiro buyuang mangambang galeh, baniaik kito manggaleh untuak urang buko puaso, itu baru urang ba iman nak, di sinan rahmat mangko ka tumbuah, apo mak ananyo nak?, jan sampai buyuang ma ukua nikmat jo rahmat tuhan dari rasaki nan di agiah nyo, batua nak, kok kito kambang galeh siang puaso, banyak nan mambali, tantu gadang lo untuang nyo, itu bukan rahmat tu nak, tapi itu tuhan berang nak, gadang pitih indak barakaik nan di agiahnyo, alah tu ka jaleh di nak kanduang.

Taruih nan kalimo adolah Naiak Haji kamakah bilo kito lah mapu.

Ba’a mangko ado ujuangnyo “ Bilo Mampu”?, banayk nan paralu kito tau nak di siko, mukasuik mampu ko adolah mampu sacaro lahia juo mampu sacaro batin, mampu jo tangguang jawab, Ijan sampai mampaturuikkan hati gadang nak, dek mancaliak urang subalah naiak haji, awak bagageh pulo nak barangkek. Rancak tu nak, tapi caliak dulu ka badan diri, alah ko mampu lahia jo batin.

Di batin lah ta niaik, basaratoan jo pangatahuan nan cukuik, baka tuak ka di bao lah ado, nan untuak urang nan tingga lai indak kurang.

Ijan samapai dek kito nak naiak Haji, Utang tumbuah tak tabaia, urang nan tingga (Anak Bini sarato keluarga lain) lah marasai, indak guno nan bak nantun, cukuik kan sugalo nan paralu lahia jo batinnyo, baru kito barangkek, itu baru namonyo mampu.

Nak dek ari lah pukua duo baleh, kini dek ari Juma’aik pulo, ayah nak pai kamusajik nak, pai sumbayang Juma’aik, nan iko Wajib ko nak pado diri kito Laki laki, ijan sampai lo anak talupo tantang iko, iyo indak masuak di rukun islam nak, tapi wajib bagi kito ko nak satiok ari Juma’aik.

Melah ayah cukuik kan sampai disiko dulu, bisuak nak ayah sambuang baliak pitaruah nangko…….

Pitaruah Ayah Part 4

Nak Kanduang Sibiran Tulang

Nan Ari kini melah ayah lanjuik kan pitaruah nangko, ka jadi suluah di anak di nan kalam isuak bilo anak lah mulai gadang.

Ayah caliak ari ka ari, anak baransua gadang juo.

Isuak kok buyuang maso bujang tangguang nak, remaja urang namokan, umua sakiro 14 taun, maso puber ayah katokan, ukatu itu nak anak musti ati ati nak, pandai pandai mambaok diri, apo tu maso puber atau bujang tangguang ?, melah nak ayah cubo curahkan, simak kan bana dek nak kanduang supayo indak kaliru anak isuak, jan sasek anak malangkah.

Maso maso nan kutiko iko nak adolah maso panca roba, atau maso parubahan, pado maso iko banyak nan barubah pado diri kito nak sado urang pado umumnyo, satiok urang mangalaminyo jo malaluinyo.

Tipak pado kito kaum laki laki nak, nan suaro mulai baransua gadang, antah apo kasababnyo ayah kurang paham, tapi manuruik agak agak ayah, itu mungkin dek jakun lah mulai tumbuah, dek karano pita suaro badakek an jo jakun, mungkin mambaok parubahan dek nyo tumbuah, antah lah… itu cuman agak agak ayah, taruih bulu bulu lah mulai tumbuah, kok si sunguik lah maramang, nan kok jangguik baitu pulo, di tampek tampek tasuruak lah tumbuah pulo bulu nak, sarupo di katiak jo tampek tampek nan lain.

Di maso iko nak mulai pulo barubah caro bakawan nak, caro bagaua, kok panampilan bajago bana, baju ba pantang kusuik, kok rambuik taruih rapi mangkilek, acok bagurau samo gadang, duduak basamo di simpang jalan, di ma padusi rami nan inyo lah sato pulo duduak di sinan basiginyang, itu lah ka huqkum dek alam manusia, lah biaso.

Nak kanduang buah hati ayah.

Di maso maso sarupo iko, buyuang ibaraik yam jantan jolong mangurak, kok sembai baru ka tumbuah, baitu juo susuah baru ka ta budua, nan ba kukuak baru ka pandai, singkek singkek jo patah patah, di ma ado lasuang di sinan nyo lah manggareseh, tiok sabanta lah malompek ka ateh paga, ba baeh kukuk mandayo batino lain, ba puta di lua dangau lansuang sajo, kok ka masuak ka dalam dangau, disinan ado jantan gadang, kok ka di lawan raso indak tagerai dek badan, tapaso bacaliak sajo dari jauah.

Oi Nak Kanduang janyo ayah.

Walau iko alah biso, dan satiok kito malaluinyo, tapi samantang pun ba itu awak mesti ado rem jo kamudi nak, supayo oto ko dapek kito kendalikan, apo rem nyo ado lah norma jo susila, apo kamudinyo iyolah Iman jo takwa, kok oto indak ba rem jo kamudi tantu nyo lendo kasado alahnyo, indak ciek juo nan ma ambek nyo, Lah jaleh jalan babelok, tapi nyo luruih sajo, lah tajun ka dalam lurah mangko nyo baranti, baitu juo bilo rem indak ado, bilo lah nyo panjek ngarai jo tiang listrik baru nyo baranti, tantu nan oto lah tajun lurah lah ma manjek ngarai jo tiang listrik iyo ndak elok lai, lah cayia, walau pun di paelok an bana, mungkin lai namuah, tapi indak sarancak oto nan indak pernah tajun lurah jo panjek tiang listrik, ijan sampai buyuang tasasek isuak.

Ayah paham bana nak, dek ayah lah malaluinyo, awak nak manjadi paratian urang, sadonyo nak labiah dari urang, nan urang bia lah di bawah sadonyo, itu lah di barih makan paek, lah kasipaik di manusia sarupo itu, manusiawi baso kerennyo, tapi samantang pun baitu, ukua lah baying sapanjang badan, usah nak gadang pado batang ijan nak tinggi pado rantiang, bia mato ma narawang ka langik tinggi, kana kaki tatap ma mijak tanah nak, baa mangko ba itu?, supayo awak indak manjadi gunjiangan urang, sadangkan nan lai bajalan di rel sajo jalan kureta lah banyak juo gunjiang tiok suduik, kunun pulo kok lah di lua jalur jalan nyo.

Ba caronyo? Simak lah dek buyung nak ayah curah kan. caronyo adolah jo manantui badan kito nak, kana sia bana awak, kok nyampang iduik co iko juo, kito urang indak barado, buyuang mesti paham tantang nantun, usah nak labiah dari itu, ijan ba lagak bak urang kayo, usah hati nak tinggi pulo, kok urang tinggi hati nak, manjauah urang pado awak, kok mangecek di bawah bawah, kok manyauak di ilia ilia, kok manyauak usah mangaruahi luak nak, supayo urang jan nyo berang ka awak, pandai pandai mambaok diri, itu intinyo.

Nyampang kok lai barubah iduik ko isuak, di bari rasaki dek tuhan, barubah iduik kito, usah nak mampalgak kan kayo nak, buruak di caliak urang, senjang di mato rang rami, berang bana tuhan tantang itu nak, indak salamaik iduik kito jadi nyo, tapi kok lai ado barado, babagilah jo urang kuliliang, ringan kan tangan capek kan kaki manolong urang, awak ka manjadi tuladan dek rang banyak, di sinan simpati urang mangko katumbuah, lai tu ka jaleh dek buyuang.

Sakitu dulu pasn ayah nagko, aril ah baransua sanjo nak, subanta lai wa katu asya ka masuak, bisuak nak ayah sambuang baliak

Pitaruah Ayah Part 5

Nak kanduang sibiran Tulang, buah hati limpo bakuruang, melah kini ayah sambuang baliak, pitaruah ka patang nan tabangkalai.

Baranjak buyuang maikuik hari, hari batuka musim baganti, baransua umua buyuang pakai, batah lamo dunia buyuang unyi, sukiro 17 baleh tahun buyuang isuak, umua cukuik gadang lah mulo, kiro sikolah sadang smu atau aliah nak, disinan godaan batambah banyak, dek dunia buyuang batambah laweh, karano kawan samangkin rami, nan cukuik parangai jo kurenah nyo.

Nan pado maso iko nak, buyuang ibaraik motor / honda baru nak, nan abih maso running nyo, lapeh tangguang jawab dialer, walau indak lapeh bana, tapi lah gak jarang masuak ka sinan, dek lah banyak bengke nan nampak. Kok rusak bana masin kini, lah tasarah dinan punyo mampaelok i, nan biaso taruih sajo ba baok ka dialer, tapi kini lah banyak pilihan bengke lua, nyampang pandai ma miliah bengke, sasuai kakok tangan rang bengke jo masin honda, sabana santiang Honda tu kini nak, tapi kok nyo balain kakok tu kini, tantu alamaik kacayia masin Honda ko nak.

Nan honda ado saringan nak, saringan angin jo saringan minyak, supayo tajago barasiah nyo masin dalam, kok nan dilua kumuah tantu jo sabun B 29 agak duo culiak tambah aia jo kain lap, lah barasiah, tapi kok masin nan di dalam kumuah nak, lari Honda mancaguik caguik, nan iduik susah pulo, acok pamati tangah jalan, itu bapiliah tukang basuah nyo tu nak, musti ka bengke kito pai, mangko di pasang saringan nantun nak, supayo jan capek bana kaburator tu kumuah.

Baitu juo jo minyak sarato oli, bali lah minyak nan barasiah, jan asa minyak sajo, usah di campua minyak bensin tu jo solar atau minyak tanah, nan kok dapek isi bensin di teng bensin nak, situ tajamin barasiah minyak, tibo di ukuran ganti oli, usah pakai oli sumbarang sajo, nak awet masin honda awak, ganti lah oli nan agak rancak, usah oli dorom sajo, apo lai oli bekas.

Dalam hiduik baitu pulo nak, hiduik musti ado saringan, baitu juo bengke, minyak jo oli, supayo nak awet iduik kito nak, injan manjadi antimun bungkuak sajo, nan masuak karuang lai, tapi masuak etongan indak, supayo ba mak ana di mato rang banyak, mulia di mato tuhan, itu lah iduik nan kito cintoi.

Pakai lah saringan Ugamo jo adaik nak, Paelok i diri di bengke Majelis Ta’lim jo baraja adaik, gunokan minyak pituah agamo jo pituah adaik pakai lah oli pangaja rang tuo jo niak mamak, kok tapakai dek buyuang nan bak nantun nak, salamaik iduik di dunia, suko urang samo awak, ka tampek batanyo dek rang kampuang, ka pambimbiang anak kamanakan, di akhiraik insya Allah sarugo lah mananti, sanang iduik di masyarakaik, mulia kito di hadapan tuhan.

Nak kanduang janyo ayah, kito iduik di dunia nangko, ibaraik kappa gadang nak, nan balia di lauik basa, kini sadang malapeh panek maisi baka di pulau dunia untuak malanjuik kan pajalanan manuju palabuhan akhir nan banamo Akhiraik, samaso balaluah di pulau dunia, carilah baka untuak ka di bao di jalan, usah lengah di pulau nantun , sabab iko bukan tujuan, anyo singgah sabanta sajo, iko bana nan di sabuik rang minang tu nan iduik jo falsafah, Adaik basandi Syara’, Sara’ basandi Kitatabullah, mukasuiknyo adolah jalan kan adaik kito ko Minangkabau sasuai jo ajaran ugamo Islam, samantang pun ado nan manyimpang saketek saketek itu lai indak baa, sabab ba dek baitu, karano nan adaik ko cipta an manusia, sadang ugamo turun dari tuhan, mangko nan namonyo ciptaan manusia indak do sampurna, indak ado gadiang nan indak ratak, Allah ta’ala nan basipaik bana.

Tapi nan kini ko yo lah banyak bana nan dilua jalur nak, ijan kan di ugamo, dari adaik sajo lah jauah panggang dari api.

Kok namonyo rang minang tu musti manggarati jo Ampek nak, itu bapakai dalam iduik.

Ampek dalam makana disiko ba macam ragam, tapi dek ayah bagi nan induak nyo sajo, yaitu:

Nan partamo kito musti tau jo diri.

Nan kaduo kito musti tau jo urang lain.

Nan katigo kito musti tau jo alam lingkungan.

Nan ka ampek kito musti tau jo Tuhan.

Kok lupo agak ciek alamaik ka caia gatah ko mah nak, sansaro iduik di dunia, marasai pulo bilo lah dalam kubua isuak.

Ditulis dalam Mutiara Cinta. 1 Comment »

Satu Tanggapan to “Pituah Ayah”

  1. hendra Says:

    tarimo kasiah ayah atas bimbingan nya


Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: