Minang Kabau Bukan Kubangan Kabau


Assalamu’alaikum Wr wb
Jo salam kato di buka, tatuju ka rang nan basamo, indak basabuik baimbau gala, tuak dunsanak nan mambaco tulisan nangko..

Lah di calaik dinok kan bana, apo subananyo nan tajadi, bukan kami nak manyasa diri, indak pulo nak mahujat urang, tapi subana bana ta jadi, dek bisiak lah samo kadangaran, taunjuak bana di muko mato, jaleh tadanga di talingo.

Kok di caliak katangah ranah kampuang, nan banamo Minangkabau, dahulu kok di danga curito rang tuo, nagari elok damai sentosa, nan tasabuik Bumi sanang Padi manjadi, kini tasuo di jaman nangko, jauah bana dari nan bak nantun, bak umpamo siang jo sanjo rayo, walaupun alun lai malam ari.

Dicaliak di sigi sigi, mulai dari kurenah rang pandai, nan manamokan diri niniak mamak jo cadiak pandai, cukuik alim ulamo job undo kanduang, kasuluah bendang dalam nagari, kapambimbiang anak jo kamanakan, nan kapai tampek batanyo jikok pulang tampek babarito, nyo babuek cando rang pandia, manyonsong adat jo ugamo, Jaleh bana tangiang di talingo, tabayang bayang di palupuak mato, korupsi berjamaah anggota DPRD sumbar nan kapatang ko.

Batanyo kami rakyat biasoko, di ma ko latak malunyo kini, lai ko patuik nyo bak nantun, Jaleh bana arang lah tacoreng di kaniang, kok nyo tacoreng di badan lai baju ka palampok nyo, tapi kini lah tumbuah di kaniang, lai ko mungkin di agiah sarawa?

Dicaliak pulo mudo jo mudi, ilang malu raso jo pareso, jalan nyo indak lai di ateh rel.

Di sigi ka caro pakaian nan padusi, indak do lai malu inyo taruah, saroman bana jo rang nasrani, nan iduik di nagari eropah jo amerika tu, nan kito sabuik budaya barat, kok pusek lah nyo nampakkan di galanggang, kok katiak baitu pulo, sampai ado nan tak ba pakaian dalam, na’uzubillahhiminzhalik.

Lah rindu bana mato ko kini, mancalaik nan gadih pakai kebaya, baju kuruang caro awaknyo, lai jilbab inyo lakekkan, tapi mode ba jilbab kudo, kapalo basaok ikua ba bukakkan, ba pakai jilabab jo baju ketat, lankok jo sarawa jeans nan mancetak body, antah apo lain an ka tasuo.

Caliak pindah ka nan laki laki, lah biaso sajo minum alkohol jo maisok madat, lah caia bana rasonyo kini, indak do lai minangkabau tasuo, tapi minang abih lah tingga kabau, lai ko ado tagua jo sapo, antah lah …bialah saluang nan manyampaikan?

Baliak kito mancalaik kasurau, indak do lai, disinan sumato mangaji agamo, tapi lah cukuik jo politik bagai, alamaik kacaia banso jo agamo ko, kok nyo di campua tapuang jo bareh.

Oi minang Kabau….

Indak do lai nagari nan elok, kini lah barubah jadi kubangan kabau, lah baluluak kian ka mari antah jo apo ka mambarasiahkannyo, kok nyo kubangan di tangah padang, lai indak ado balintah, tapi kini kubangan di dalam bancah, nan baisi jo lintah banyak, nan ka maisok darah minang ko.

Ka sia kami ka mintak tolong lai, ka mano kami ka mangadu, lah di cubo ka niniak mamak, niniak lai mamak nan tido nan ado anyo niniak ngangak, pai pulo ka cadiak pandai, cadiak banyak pandai lah ilang, nan ado anyo cadiak buruak, di cubo pai ka alim ulamo, alim santiang ulamo abih nan ado anyo alim ngango, bapitunjuak ka bundo kanduang, bundo basuo kanduang lah mati, nan tasuo bundo dek bunduang.

Oi ranah minang….

Maminta kami sungguah sungguah, usah di bayangi kami jo maso lalu, maso minang tampek rang batanyo, kutiko minang tampek rang maminto, ukatu minang tampek rang baiyo, kiniko anyo bayang bayang sajo.

Nan kampuang lah tajua, kok rimbo lah abih, nan tingga kini bancano nan acok malando kampuang nangko, pakiak anak nagari di tangah malam, dek galodo nan manimpo, di tangah malam langang barubah isak jo rarau, dek banjir datang mahondoh.

Disususn jari nan sapuluah, di takuakan kapalo nan ciek, maminta kami ka niniak mamak jo cadiak pandai, sarato alim ulamo jo bundo kanduang, baliak kan baliak fitrah nagari, nak bajalan kami jo kapalo tagak, bia nak sajajar jo anak nagari lain, tunjuak ajari kami nagko, jikok nyo langkah tadorong salah, bia nak di ganjua langkah ko suruik.

Baliak kan pandai nan hialng nak nyo bakirok buruak nan ado, pulang kan baliak mamak nan tido, bia nyo pai ngangak nangko, ulamo babaliak lah kini, bia nyo hapuih ngango tu kini, iduik kan kanduang kami baliak, bia nak bakubua bunduang tu kini……!!!!

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: